Қасым-Жомарт Тоқаев Үкіметке денсаулық сақтауды қаржыландыру тәсілдерін қайта қарауды тапсырды

Қазақстан халқына Жолдауы барысында Президент медицина саласындағы жоспарланған реформалар туралы айтып берді, деп хабарлайды YK-news.kz тілшісі.

— Денсаулық сақтау саласында енгізілген  реформаларға қарамастан, бұл саланың жағдайы мәз емес. Жинақталған мәселелердің бүкіл кешенін бір уақытта шешу мүмкін емес екені анық. Сондықтан күш-жігерді аса маңызды аспектілерге шоғырландыру керек, олардың бірі қаржыландыру жүйесі болып табылады, — деп атап өтті Қасым-Жомарт Тоқаев. — Саланы ұзақ уақыт бойы қаржыландырмау сақтандырылған азаматтардың медициналық қызметтердің тиісті көлеміне қол жеткізе алмауына әкеліп отыр. Медициналық көмекті мемлекет кепілдік берген және сақтандыру пакеттеріне жасанды бөлу жағдайды ушықтырады. Сақтандыру моделінің жоқтығын айту керек. Бұл үлкен олқылық.

Мемлекет басшысының айтуынша, ерікті медициналық сақтандыруды іске қосу орын алған жағдайдан шығудың жолы болуы мүмкін.

— Үкіметке Денсаулық сақтау мен әлеуметтік саланы қаржыландыру тәсілдерін қайта қарауды тапсырамын. Медициналық инфрақұрылымды, оның ішінде мемлекеттік-жекешелік әріптестік арқылы кешенді жақсартуға ерекше назар аудару қажет. Медицина – инвестициялық тартымды сала, тек дұрыс жағдай жасау керек, — деп жалғастырды Президент.

Сонымен қатар, Қасым-Жомарт Кемелұлы келесі жылдан бастап еліміздің ауыл тұрғындарының қажеттіліктеріне бағытталған ұлттық жобаны іске асыру басталатынын атап өтті.

Екі жыл ішінде бүгінде медициналық мекемелері жоқ 650 ауылда медициналық және фельдшерлік-акушерлік пункттер салынып, толық жарақтандырылатын болады. Осылайша, мемлекет миллионнан астам азаматқа алғашқы медициналық-санитарлық көмекке қол жеткізуді қамтамасыз етеді.

Ұлттық жоба аясында 32 аудандық аурухана жаңғыртылып, ауданаралық көпсалалы мекемелер болып қайта құрылатын болады. Оларда инсульт орталықтары, хирургия, реанимация және оңалту бөлімшелері пайда болады. Бұл төрт миллионнан астам азамат үшін медициналық қызметтердің сапасын арттыруға мүмкіндік береді.

Шалғай аудандардың тұрғындарына білікті көмекке қол жеткізуге мүмкіндік беретін телемедицина дамиды.

— Отандық денсаулық сақтаудың бәсекеге қабілеттілігін арттыру үшін дәрігерлерді даярлау жүйесін дәйекті түрде жетілдіру қажет. Медициналық жоғары оқу орындарының жанынан көпсалалы университеттік ауруханалар мен клиникалар құрылатын болады. Үш жыл ішінде резидентурада даярлауға арналған гранттардың жыл сайынғы саны 70 пайызға артады, — деп қорытындылады Қасым-Жомарт Тоқаев.