ҰҚК департаменті мектептер мен жоғары оқу орындарының түлектерін қонаққа шақырды
Дәстүрлі Ашық есік күнін Өскемен, Ұлан және Глубокое аудандарының жастары үшін еліміздің басты арнайы қызметінің қызметкерлері өткізді. Іс-шарада ведомство жұмысының барлық қыр-сыры туралы сұрап қана қоймай, сонымен қатар жауынгерлік қаруды қолға ұстап, арнайы операциялар кезінде қолданылатын техниканы көруге де мүмкіндік болды.
Сәуір айының соңғы жұмасында Ұлттық қауіпсіздің комитетінің облыстық департаменті өз есігін айқара ашты. Жәй күндері режімді нысанға кіру оңай болмаса, бұл күні ұйым қонаққа келген мектеп пен колледждердің елу түлегін күтіп отырған болатын.
Балаларды ҰҚК қызметкерлерінің қалай жұмыс істейтінін көрсету үшін шақырса да, ұйымдастырушылардың айтуына қарағанда, ашық есік күні кәсіптік бағдар берумен қатар, патриоттық пен қазақстандық қоғамның құндылықтарын танымалдандыруға бағытталған шара екен.
Түлектермен кездескен Департаменттің қызметкерлері ведомство үшін кадрлар даярлайтын жоғары оқу орындарына түсу ережелері туралы айтып қана қоймай, қоғамда қалыптасқан бірнеше стереотиптерді жоққа шығарды. Мәселен, қызу әңгімеде ҰҚК-нің барлық қызметкерлері өздерінің жеке басын жасыруға мәжбүр емес, ал олардың жұмысының басым бөлігі үстел басында отырып, компьютер арқылы құжаттарды зерттеуде өтетіні белгілі болды.
Қонақтардың бірі ҰҚК қатарына тек түрі есте сақталмайтын адамдарды ғана ала ма деген сұрағын қойып еді. Ұлттық қауіпсіздік қызметкерлері, керісінше, ҰҚК-да ерекше дағдылары бар ерекше тұлғалар қажет деп түсіндірді. Сондықтан, егер маман, мысалы, компьютерлік технологияларды жетік меңгерсе, Департаментте оны қуана қабылдайды. Бұл әсіресе қазіргі кезеңде өзекті, еліміз киберқылмыскерлерден де қорғалуы керек.
— Ең бастысы, ҰҚК-бұл 1992 жылғы 12 шілдеде қабылданған ҚР жеке заңымен бекітілген жалғыз арнайы орган, — деп атап өтті ҰҚК полковнигі Дмитрий Щербик талапкерлермен сұхбатында. — Мұнда елдің әскери-саяси элитасы шоғырланған. Яғни, кең ой-өрісі, дамыған патриотизмі, Отанына өзінің тұтастығы мен егемендігін сақтауға көмектесуге деген ұмтылысы бар жастар мұнда өзін-өзі жүзеге асыруға көптеген мүмкіндіктер ала алады. ҰҚК жоғары оқу орындарына түсудің қазіргі жағдайында кең ауқымды мағынадағы маман болуға, бірегей білім мен тәжірибе алуға болады. Біздің қызметіміз қиын болса да, өте қызықты. Сонымен қатар, біздің мамандардың жақсы жалақысы, тамаша әлеуметтік пакеті бар. Бұл да маңызды. Ең бастысы — ниет керек, өйткені біздің оқу орындарына түсу үшін бір ҰБТ жеткіліксіз. Әлемді сәл кеңірек көру керек, онда болып жатқан процестерді түсіну керек.
Кездесу аяқталғаннан кейін қонақтар ҰҚК Шығыс Қазақстан департаментінің мұражайына барды, онда оларға өңір аумағында қауіпсіздік органдарының құрылуы, олардың қызмет ету кезеңінде жүргізген қызықты операциялары, тарихи ретроспективада жеке құрамның формасы мен қару-жарағының қалай өзгергенін көрсетті. ШҚО ҰҚКД қызметкері Дулат Сахариев Семей ядролық полигонының жұмыс істеуі жағдайындағы облыстың қауіпсіздігін қамтамасыз ету, 1999 жылы болған ШҚО-ны Қазақстан аумағынан күштеп бөлуге бағытталған "Пугачев көтерілісі" деп аталатын сепаратистік топтың қызметін тергеу және жолын кесу және басқа да белгілі операциялар туралы айтып берді.
— Біз жас жігіттердің біздің мамандығымызды таңдап, бізге келуіне өте мүдделіміз, — деп атап өтті Дулат Мұхтарұлы. — Сондықтан да мұндай іс-шаралар дәстүрге айналды. Біз студенттер мен оқушылар үшін ашық есік күндерін бірінші рет өткізіп отырған жоқпыз. Олар да ҰҚК қызметіне қызығушылық танытуда. Оны қойылатын сұрақтардан да көруге болады. Олар бізге Отанымыздың игілігі үшін қызмет етуге келеді деп үміттенеміз.
Қонақтар үшін арнайы техника мен қару-жарақ та көрсетілді. Олар жасырын қару-жарақ немесе есірткі іздеуді білетін қызметтік иттердің жұмысымен таныстырылды. Бірақ жігіттер үшін ең қызықтысы жауынгерлік қаруды көру болды. Автоматты пистолет пен снайпер винтовкасын қолға күнде ұстай бермейсіз ғой.
— Қазір мен "техник-бағдарламашы" мамандығы бойынша оқуды бітіріп жатырмын, бірақ бала кезімнен әскери болғым келді, — деп мойындады қонақтардың бірі Қ.Нұрғалиев атындағы колледждің соңғы курс студенті Арлан Шыңғысханов. — Маған осындай мүмкіндік беріліп отыр және мен өз арманымды жүзеге асырғым келеді. Колледжден кейін шекара академиясына түсу оңайырақ, ал егер мен өзімді көрсете алсам, ҰҚК негізгі академиясына ауысамын. Мен әскерилер отбасынан шықпасам да, қалауым осы. Мен бұл оңай жұмыс емес екенін түсінемін, бірақ бәрінен бұрын тұрақтылық береді. Сондай-ақ мен үшін маңызды нәрсе - осылайша мен өз Отаным алдындағы борышымды өтеймін. Сонымен қатар, ҰҚК қызметі мансаптық өсуге мүмкіндік береді. Оқуға түсер алдында мен ант беремін ғой, содан кейін команда жіберетін жерге барамын, бұл менің елім үшін қажет.