Шығыс Қазақстан облысында медициналық туризмді дамыта бастады

"Қазақстандық медициналық туризм қауымдастығы" ЗТБ (ҚМТҚ) қазірдің өзінде онкологиялық қызметпен жұмыс жүргізуде. Жақын арада шетелдік пациенттерді қабылдауға дайындықты неврологиялық, кардиологиялық, оңалту қызметтері мен ана мен бала орталығы да бастайды.

19 наурызда ШҚО әкімі Ермек Көшербаев қазақстандық медициналық туризм қауымдастығының басшысы Кристина Кривецпен және өңірдің кейбір медициналық мекемелерінің басшыларымен кездесті. Іс-шара барысында қатысушылар облыстың әлеуетін талқылап, шетелдік пациенттерді тарту стратегиясын белгіледі.

— Біз медициналық туризм жүйесін құруымыз керек, — деді Ермек Беделбайұлы. — осы мәселе бойынша бірлесіп жұмыс істейік.

Облыс басшысы медициналық мекемелер барлық бизнес-процестерді қайта қарауға мәжбүр болатынын атап өтті. Бұл жағдайда зерттеу мен емдеудің сапасына ғана емес, сонымен қатар қызмет көрсетуге де назар аудару керек. Пациенттерді жақсы тамақтандыру, оларға жайлы өмір сүру жағдайларын жасау, емдеудің барлық кезеңдерінде сүйемелдеу және т.б. қажет.

— Емделуге келетін адам басын ештеңемен қатырмауы керек. Оның міндеті-ақша төлеу және жоғары сапалы қызметке қол жеткізу, — деп атап өтті Шығыс Қазақстанның әкімі.

ШҚО-да медициналық туризмді дамыту онкологиялық, неврологиялық, кардиологиялық, оңалту қызметтерінен, ана мен бала орталығынан басталады. Дәл осы ұйымдар бүгінде әйгілі әлемдік клиникалармен бәсекелесу үшін жеткілікті жабдықталған. Сонымен қатар, дәл осы ұйымдарда жоғары білікті мамандар жұмыс істейді.

Қауымдастық басшысы Кристина Кривец өңірдің жақын арада шетелдік қонақтарды қабылдауды бастау үшін барлық мүмкіндіктері бар екенін растады.

— Бүгінгі таңда Шығыс Қазақстандағы медицина біздің азаматтарымыздың ғана емес, шетелдік пациенттердің де назарына лайық. Ең алдымен, бұл бағытты танымал ету маңызды, өйткені бұл туралы білетін адам саны саусақпен санарлық. Олар әдетте медициналық көмекке жүгінгендер немесе бұл туралы достары мен әріптестерінен білетіндер, — деді маман.

Айта кетейік, ШҚО ҚМТҚ саласын жүйелеу бойынша кешенді жұмыс істейтін елдегі алғашқы өңір болады.

— Нақты мерзімдер қою дұрыс емес. Бірақ менің ойымша, облыс басшылығы да, дәрігерлердің өздері де осы мәселеге құлшыныспен қарайтындықтан, алты ай ішінде алғашқы нәтижелерді көре аламыз, — деп сендірді Кристина Сергеевна.

Алғашқы қадам жасалып қойды: қазір қауымдастық онкологиялық қызметпен жұмыс істеуде.

— Біз екі апта бұрын бастадық. Енді не істейтініміз және қалай істейтініміз, не нәрсеге баса көңіл бөлу керектігіміз туралы нақты стратегия пайда болады. Біз проблемасы бар тұстарды мүмкіндігінше тез жою және пациенттерді толық қабылдауды бастау үшін анықтаудамыз, — деп қосты қауымдастық басшысы.

Облыс басшылығының пікірінше, шетелдік пациенттердің пайда болуы өңір экономикасына оң әсерін тигізеді және медициналық мекемелерге кредиторлық берешекті өз бетінше жабуға мүмкіндік береді.

— Дәрігерлер екі-үш жерде жұмыс істемейтін болады. Жөндеу жұмыстарына да ақша пайда болады, — деп атап өтті Ермек Беделбайұлы.