Риддер қаласының өнеркәсібі тұрақты өсімді көрсетуде

Риддер қаласының өнеркәсіп саласы тұрақты дамуын жалғастыруда. Ағымдағы жылдың қаңтар-қараша айлары аралығында қала кәсіпорындарының өндіріс көлемі 143,5 миллиард теңгеге жетіп, өткен жылдың сәйкес кезеңімен салыстырғанда 2,7%-ға артты. Нақты көлем индексі 108,1%-ды құрап, өндіріс көлемінің едәуір өскенін көрсетті. Бұл туралы Риддер қаласы әкімінің орынбасары Болат Ақұжанов Өңірлік коммуникациялар қызметі алаңында мәлімдеді.

Тау-кен өнеркәсібінде айтарлықтай өсім байқалды. Өндірілген тауар өнімдерінің көлемі 267,9 миллион теңгені құрап, 2023 жылмен салыстырғанда 24,4 миллион теңгеге өсті. Әсіресе алтын құрамды концентраттар өндірісі 18,6%-ға, мырыш концентратындағы мырыш өндірісі 45,5%-ға артқаны байқалды.

Өңдеу өнеркәсібінде өндіріс көлемі 134,5 миллиард теңгені құрап, 2023 жылмен салыстырғанда 1,4%-ға өсті. Риддер үшін негізгі сала болып табылатын металлургия өнеркәсібінде 4,5%-ға өсім тіркеліп, өнім көлемі 108,7 миллиард теңгеге жетті. Шикізаттық мырыш өндірісі 96,6 мың тоннаны құрап, өткен жылмен салыстырғанда 0,8%-ға артты.

Қаланың негізгі кәсіпорны болып табылатын “Қазмырыш” ЖШС бірқатар ірі инвестициялық жобаларды жүзеге асыруда.

Электр энергиясын өндіру көлемі 154 миллион кВт/сағаттан 179 миллион кВт/сағатқа дейін артты. Сондай-ақ жылу энергиясын өндіру көлемі 397 мың Гкал-дан 619 мың Гкал-ға дейін ұлғайып, аймақ тұрақты ресурстармен қамтамасыз етілді.

Өнеркәсіп өндірісі Риддер қаласының экономикасының негізі болып қала береді. Ол жаңа жұмыс орындарын ашып, қалалық бюджетке тұрақты кіріс әкеледі. Негізгі салалардағы тұрақты өсім және инновациялық технологияларды белсенді енгізу қалаға жаңа мүмкіндіктер ашуда.