Маусым-қазан айлары аралығында елімізде президенттік жастар кадрлық резервіне іріктеу өтеді

Биыл төртінші рет өтіп отыр. Іріктеудің ерекшеліктері туралы баспасөз мәслихаты барысында ҚР мемлекеттік қызмет істері агенттігінің ШҚО бойынша департаментінің басшысы, Әдеп жөніндегі кеңестің төрағасы Ержан Айқымбеков айтып берді.

— Мемлекет басшысы дарынды, бастамашыл, жаңаша ойлайтын жастарды мемлекеттік басқару ісіне тартуға бағытталған Президенттік жастар кадрлық резервін қалыптастыруға бастамашылық жасады, — деп хабарлады Ержан Айқымбеков. — Қазірдің өзінде үш іріктеу өткізілді. 2019, 2021 және 2023 жылдардағы іріктеуге 60 мыңнан астам азамат қызығушылық танытты, олардың нәтижелері бойынша резервке 400 адам қабылданып, олардың 318-і бүгінде мемлекеттік органдарда және басқа да ұйымдарда жұмыс істейді, яғни 80 пайызға жуығы жұмысқа орналастырылды.

Департамент басшысының айтуынша, 2025 жылғы төртінші іріктеудің ерекшелігі әр бағыт бойынша кандидаттардың біркелкі санын қамтамасыз ету мақсатында оны әр кезеңде пропорционалды өткізу болып табылады. Квоталар көзделетін болады, ал іріктеу тек тиісті салалық бағыт бойынша жүргізілетін болады, бұл әртүрлі сала мамандарының біркелкі өкілдігін қамтамасыз етуге тиіс.

Кандидаттарға қойылатын талаптарға келетін болсақ, олар өзгеріссіз қалып отыр: жасы 35 жасқа дейін, жоғары білімі, жұмыс өтілі кемінде бес жыл, қазақ тілін білуі B1 деңгейінен төмен емес. Бұл ретте "А" корпусының саяси және әкімшілік қызметшілері, сондай-ақ жастар резервіне кіретін адамдар үшін конкурсқа қатысуға жол берілмейді.

Іріктеу ҚР Президентінің 2019 жылғы 27 тамыздағы Жарлығымен бекітілген ережелерге сәйкес алты кезеңнен тұрады және маусымнан қазанға дейін өтеді.

Бірінші кезең — резервке қабылдау үшін кандидаттардың құжаттарын қабылдау, ол 1 маусымнан бастап және бір ай ішінде онлайн режимінде, арнайы ақпараттық жүйеде жүзеге асырылады.

Екінші кезең — мәтіндік және сандық ақпаратпен жұмыс істеу қабілетін бағалау (2-3 тамыз және 9-10 тамыз), үміткерлердің осы бағыттардағы қабілеттерін анықтауға мүмкіндік беретін тестілеуден тұрады.

— Талаптарға сай келетін барлық үміткерлер мәтіндік ақпаратпен жұмыс істеу қабілетін бағалаудан өтеді, — деп нақтылады Ержан Айқымбеков. — Сандық тестілеуге әрбір салалық бағыт бойынша ең көп балл жинаған үміткерлердің 50 пайызы жіберіледі. Тестілеу қорытындысы бойынша келесі, үшінші кезеңге – ситуациялық міндеттерді шешуге 600 кандидат жіберіледі, оның ішінде үздік нәтижелерге қол жеткізген әрбір салалық бағыт бойынша 100-ден аспайтын кандидат өтеді.

Үшінші кезең — ситуациялық міндеттерді шешу — 16-17 тамызда өтеді, кандидаттардың өздері таңдаған салалық бағыттарға байланысты нақты проблемаларды шешу жөніндегі ұсыныстарын бағалауға бағытталған. Бұл кезең де онлайн режимінде, эссе жазу форматында өтеді.

Төртінші кезең — кандидаттардың құзыретін бағалау, ол 22 тамыздан 3 қазанға дейін өтеді, оған 300 кандидат жіберіледі.

Бұл кезең екі блоктан тұрады: ассессмент орталығы (немесе бағалау орталығы) және құзыреттілік бойынша сұхбат. Ассессмент-орталық 22-28 тамызда мемлекеттік басқару академиясының базасында офлайн форматта өтеді. Мінез-құлық индикаторларының жиынтығымен ол үміткерлердің көшбасшылық, талдау және проблемаларды шешу, қызметті басқару, сенімділік, белсенділік сияқты қажетті құзыреттерін бағалауға бағытталған. Ал ассессмент-орталықтан өту қорытындысы бойынша 200 қатысушы құзыреттері бойынша әңгімелесуге жіберілетін болады.

Кәсіби HR — менеджерлерді тарта отырып құзыреттер бойынша сұхбат өткізу 23-28 қыркүйекке жоспарланған. Сұхбат кандидаттардың ішкі уәждемесі мен құндылық бағдарларын айқындайтын құзыреттерді анықтауға бағытталады деп болжанады. Оның нәтижелері бойынша келесі кезеңге 150 қатысушы жіберіледі.

Бесінші кезең — сараптама комиссиясында әңгімелесу, ол 8-15 қазан аралығында өтеді.

Содан кейін сараптамалық комиссия отырысының қорытындысы бойынша Ұлттық комиссия отырысына 100-ден аспайтын кандидаттардың тізімі енгізіледі.

Ақырында, соңғы, шешуші алтыншы кезең ретінде резервке үздік 50 үміткерді қабылдау жөніндегі ұлттық комиссияның отырысы өткізіледі. Ол 25 қазанға дейін өтеді, шешім қазан айының соңына дейін шығарылады деп күтілуде.

Мұқият және қатаң іріктеу нәтижесінде үздік, болашағы зор жастардың елуі Президенттік жастар кадрлық резервінің тізіміне енеді.

— Ел мүддесіне адал қызмет еткісі келетін жастарды Президенттік жастар кадрлық резервіне іріктеуге қатысуға шақырамын. Мемлекеттік аппаратқа Отанға қызмет етуді өз міндеті деп санайтын білімді, еңбекқор, өршіл жастар қажет, — деді Ержан Айқымбеков.

Бұл ретте ол ҚР мемлекеттік қызмет істері агенттігінің стратегиялық міндеттерінің бірі жастардың күш-жігері мен білімін ел мүддесіне қызмет етуге бағыттау, кәсіби мемлекеттік қызметшілердің жаңа ағымын қалыптастыру болып табылатынын еске салды.

Президенттік жастар кадрлық резерві, бұл кадрлық мәселенің шешімі ғана емес, бұл мемлекеттік басқару мен елдің дамуына үлес қосқысы келетіндер үшін бірегей мүмкіндік.