ШҚО оқушылары жазғы демалысты қалай өткізеді?

Осы жазда ШҚО-да мектеп оқушыларының басым бөлігі демалыспен, сауықтырумен және пайдалы іспен қамтылады. Нақты айтқанда, бұл балалардың 99,9%-ын, яғни 93 мыңнан астам оқушыны құрайды.

Жазғы іс-шараларды ұйымдастыруға 362 млн теңге бөлу жоспарланып отыр. Бұл қаражат лагерьлерді жөндеуге, материалдық-техникалық базаны нығайтуға және жолдамалар сатып алуға бағытталады. Ең алдымен көпбалалы және аз қамтылған отбасылардан шыққан балаларға басымдық беріліп, олар 100% демалыспен қамтамасыз етіледі. Жоспар бойынша өңірде 12 қала сыртындағы лагерь, тамақтандырумен қамтылған 276 мектеп жанындағы алаң, 200-ден астам бейінді алаң мен үйірме жұмыс істейтін болады. Жалпы жазда жүздеген педагог, тәлімгер және медицина қызметкері жұмылдырылады.

Оқушылар үшін тек демалыс қана емес, экскурсиялар да ұйымдастырылады. Атап айтқанда, туристік сапарлар, мектептің орман шаруашылықтарындағы бос уақытты тиімді өткізу, колледждер жанындағы кәсіптік бағдар беру алаңдары. Оқушылар робототехника, аспаздық, тілдерді меңгеру және өзге де бағыттармен таныса алады.

Жеке жоба ретінде әскери-спорттық лагерь, Бұқтырма су қоймасы арқылы теплоходпен саяхат, колледж студенттеріне арналған демалыс бағдарламалары іске асырылады.

Жасөспірімдердің қауіпсіздігі де басты назарда. Лагерьлерде бақылау жүргізіліп, жағажайлар тексеріліп, жаз бойы мониторингтік топтар жұмыс істейтін болады.