Жылдар бойы күткен су келді: Самар ауданындағы ауылдар орталықтандырылған су жүйесіне қосылуда

Самар ауданында жылдар бойы шешілмеген су мәселесі шешімін табуда Құлынжон, Көкжыра және Аққала ауылдарының тұрғындары көпшілік үшін күнделікті үйреншікті жағдайға айналған үйдегі краннан су ағуын жылдар бойы күтті. Бұған дейін бұл шағын елді мекендерде орталықтандырылған сумен жабдықтау жүйесі болған жоқ. Тұрғындар құдықтар мен тереңдік сорғыларын пайдаланып келді.

Су құбыры желілерін қайта жаңғырту және дамыту жобасы 2019–2020 жылдары басталған болатын. Алайда оны іске асырудың бастапқы кезеңдерінде жұмыстардың сапасыз орындалуына байланысты бірқатар мәселелер туындады. Соның салдарынан жоба толық пайдалануға берілмей, сумен жабдықтау мәселесі бірнеше жыл бойы шешімін таппады. Тұрғындар бұл мәселені облыс әкімімен және сол кезеңде жиі ауысқан аудан басшылығымен өткен кездесулерде бірнеше рет көтерді.

Жағдай 2025 жылы өзгерді. Сол кезде ауданның жаңа басшылығы сумен жабдықтау мәселесін бақылауға алып, нысандар бойынша жұмыстарды қайта жандандырды. Бүгінде алғашқы нәтижелер көріне бастады: әлеуметтік нысандар мен тұрғын үйлер орталықтандырылған жүйеге қосылуда, ал жекелеген ауылдардың тұрғындары орталықтандырылған су құбыры арқылы су алып отыр.

Жұмыстар Мемлекет басшысының халықты 100 пайыз сапалы ауыз сумен қамтамасыз ету жөніндегі тапсырмалары, сондай-ақ Шығыс Қазақстан облысының басшылығы қойған міндеттер аясында жүргізілуде.

Алғашқы нәтижені Көкжыра ауылының тұрғындары сезінді. Мұнда шамамен 140 аула бар, бүгінде олардың 20-дан астамы жаңа су құбырына қосылды. Сонымен қатар, бірінші кезекте мектеп пен басқа да әлеуметтік нысандар сумен жабдықтау жүйесіне қосылды.

— Нысандағы ағымдағы жөндеу жұмыстары толық көлемде аяқталды. Жаздың басында құбыр желілеріне гидравликалық сынақ сәтті жүргізіліп, резервуар суға толтырылды. Бүгінде нысан одан әрі пайдалануға толық дайын, — деп түсіндірді Самар ауданының сәулет, құрылыс және тұрғын үй-коммуналдық шаруашылығы бөлімінде.

Алдын ала мәлімет бойынша, Көкжыра тұрғындарының жартысынан астамы орталықтандырылған жүйеге қосылуға дайын. Қазір аудан әкімдігі, ауылдық округ және коммуналдық қызмет мамандары тұрғындар арасында түсіндіру жұмыстарын жүргізіп жатыр. Үйлерді жүйеге қосу тұрғындардың өтініштері негізінде жүзеге асырылады.

Орталықтандырылған су жүйесін жылдар бойы күткен тұрғындар үшін бұл өзгерістер күнделікті тұрмыста айқын сезіледі.

— Бұған дейін тек құдықтың суын пайдаланып келдік. Судың сапасы, әрине, онша жақсы болған жоқ. Қазір көптен күткен су құбыры үйімізге тартылып, бірден өмір сүру әлдеқайда жеңілдеді. Үйге су кіргізілген соң автоматты кір жуғыш машинаны да орнаттық. Жұбайым судың енді асүйдің өзінде болғанына қуанып жүр. Аудан әкіміне және біздің мәселемізді естіп, ауылға көңіл бөліп, оны шешуге көмектескен барша азаматқа алғыс айтамыз, — дейді Көкжыра ауылының тұрғыны Мұрат Байболатов-Қайсар.

Сумен жабдықтау жобасын іске асыру жұмыстары жалғасуда. Желілердің дайындығына қарай үш ауылдың тұрғындары орталықтандырылған жүйеге кезең-кезеңімен қосыла алады. Құлынжонда жүйеге әлеуметтік нысандар қосылып қойған, ал Аққалада су құбыры желілеріне гидравликалық сынақ жүргізілуде. Жұмыстарды осы жылдың соңына дейін аяқтау жоспарланып отыр.