ШҚО. Алтай қаласында көпқабатты үйде 25 жылдан бері бос тұрған подъезді қалпына келтірмекші
Алтай қаласында ширек ғасырдан бері бес қабатты үйдің тұтас подъезі бос тұр. Осы уақыт бойы оған көршілес өмір сүріп жатқан адамдар суыққа, қабырғалардағы жарықтар мен басқа да қолайсыздықтарға тап болуда. ШҚО әкімі Нұрымбет Сақтағанов ауданға жұмыс сапары барысында құрылыс басқармасына аудан әкімдігімен бірлесіп, мәселені шешу жолдарын қарастыруды тапсырды, деп хабарлайды YK-news.kz.
Қараусыз қалған подъезд бейәлеуметтік топтардың жиналатын орнына айналған болатын. Ал 2023 жылдың 1 қазанында үйде қайғылы оқиға орын алды – ішінен қабатаралық жабынға күртешесімен ілініп қалған ер адамның мәйіті табылды. Қазір ішке кіру мүмкін емес: бірінші қабаттағы есік-терезелер мықтап бекітілген.
— Подъезд коммуналдық меншікте, — деп түсіндірді Алтай қаласының әкімі Сергей Охременко. — 2017 жылдың өзінде пәтерлерді тұрғын үй ретінде беру мақсатында жаңғырту бойынша жұмыс жобасы әзірленген еді. Ол кезде жобаның құны 95 миллион теңге болатын. Бірақ осы уақытқа дейін қаржыландыру қолдау таппады.
Қала әкімінің айтуынша, жақын маңда жаңа өрт сөндіру бөлімі салынып жатыр. Аудан сұранысқа ие бола түспек және өрт сөндірушілер осы подъезде орналасқан 22 пәтердің жаңа тұрғындары болуы мүмкін деген нұсқа қарастырылуда.
ШҚО әкімі Нұрымбет Сақтағанов құрылыс басқармасы мен аудан әкімдігіне мәселені шешу жолдарын пысықтауды тапсырды. Ол үшін пәтерлерді жөндеуге қабілетті инвесторды тарту қажет. Осыдан кейін мемлекет кезекте тұрғандарды баспанамен қамтамасыз ету үшін жаңартылған пәтерлерді сатып алуға дайын.
Ирина Островская